ലൈഫ് പദ്ധതിയില്‍ രണ്ട് ഘട്ടങ്ങളിലായി ഇതിനകം പൂര്‍ത്തീകരിച്ചത് 1150 വീടുകള്‍; ജില്ലയില്‍ ശ്രദ്ധേയമായ നേട്ടം കൈവരിച്ചുള്ള നഗരസഭകളില്‍ കൊയിലാണ്ടിയ്ക്ക് രണ്ടാം സ്ഥാനം
കൊയിലാണ്ടി: ലൈഫ് സമ്പൂര്‍ണ്ണ പാര്‍പ്പിട പദ്ധതി 2023-24 സാമ്പത്തിക വര്‍ഷം വരെ ജില്ലയില്‍ ശ്രദ്ധേയമായ നേട്ടം കൈവരിച്ച നഗരസഭയ്ക്കുള്ള ജില്ലാതല അവാര്‍ഡില്‍ കൊയിലാണ്ടി നഗരസഭയ്ക്ക് രണ്ടാം സ്ഥാനം. ലൈഫ് പദ്ധതിയുടെ ഒന്ന് രണ്ട് ഘട്ടങ്ങളിലുള്ള ഭവനങ്ങളുടെ പൂര്‍ത്തീകരണത്തിനും പൂര്‍ത്തീകരണത്തിന് ആവശ്യമായ പ്രവര്‍ത്തനങ്ങള്‍ക്കുമാണ് അവാര്‍ഡ് ലഭിച്ചത്.
ലൈഫ് ഒന്ന് രണ്ട് ഘട്ടങ്ങളിലായി 1522 ഗുണഭോക്താക്കളില്‍ 1150 കുടുംബങ്ങള്‍ക്ക് വീട് പൂര്‍ത്തീകരിക്കാന്‍ നഗരസഭയ്ക്ക് സാധിച്ചിട്ടുണ്ട്. മാര്‍ച്ച് 23ന് പൊതുമരാമത്ത് ടൂറിസം വകുപ്പ് മന്ത്രി അഡ്വ. പി.എ.മുഹമ്മദ് റിയാസില്‍ നിന്നും നഗരസഭ ചെയര്‍പേഴ്‌സണ്‍ സുധ കിഴക്കേപ്പാട്ട് പുരസ്‌കാരം ഏറ്റുവാങ്ങും. മുഹമ്മദ് അബ്ദുറഹിമാന്‍ സാഹിബ് മെമ്മോറിയല്‍ ജൂബിലി ഹാളിലാണ് ചടങ്ങ് നടക്കുക.
ലൈഫ് പദ്ധതിയുടെ ഭാഗമായി നഗരസഭ ഗുണഭോക്തൃ സംഗമങ്ങള്‍ കുടുംബാംഗങ്ങള്‍ക്കായുള്ള ചിത്രരചന, ഉപന്യാസം മത്സരങ്ങള്‍ എന്നിവ സംഘടിപ്പിച്ചിരുന്നു. സാമ്പത്തികമായി പിന്നോക്കം നില്‍ക്കുന്ന കുടുംബങ്ങളുടെ വീട് പൂര്‍ത്തീകരണത്തിനായി വാര്‍ഡ് തല സമിതികള്‍ രൂപീകരിച്ച് കൂടുതല്‍ സാമ്പത്തിക സഹായങ്ങള്‍ നല്‍കുകയും ചെയ്തു. നഗരസഭയുടെ മറ്റു പദ്ധതികളില്‍ സംയോജനം നടത്തി കൂടുതല്‍ ഫണ്ടുകള്‍ ലഭ്യമാക്കുകയും ചെയ്തിരുന്നു.
കുടുംബശ്രീ അയല്‍ക്കൂട്ടങ്ങള്‍, അയ്യങ്കാളി തൊഴിലുറപ്പ് പദ്ധതി, പട്ടികജാതി ഗുണഭോക്തൃകള്‍ക്കായി വയറിങ്ങിനുള്ള പദ്ധതി, നഗര ഉപജീവന മിഷന്‍ എന്നിവയുമായി സംയോജിപ്പിച്ചു കൊണ്ട് ഗുണഭോക്താക്കള്‍ക്ക് കൂടുതല്‍ ഫണ്ടുകള്‍ ലഭ്യമാക്കി.