പേരാമ്പ്രയില്‍ നിന്നും ലിഫ്റ്റ് തരാമെന്നു പറഞ്ഞ് ബൈക്കില്‍ കയറ്റി; നിര്‍ത്താത്തതിനെ തുടര്‍ന്ന് ബൈക്കില്‍നിന്ന് ചാടിയ വിദ്യാര്‍ഥിക്ക് പരിക്ക്
പേരാമ്പ്ര: ലിഫ്റ്റ് ചോദിച്ച് ബൈക്കില്‍ കയറി, നിര്‍ത്താത്തതിനെ തുടര്‍ന്ന് ബൈക്കില്‍നിന്ന് ചാടിയ വിദ്യാര്‍ഥിക്ക് പരിക്ക്. വാളൂര്‍ പുതിയ മഠത്തില്‍ റിബാന്‍ എ ബക്കറിനാണ് (14) പരിക്കേറ്റത്. ട്യൂഷന്‍ ക്ലാസ് കഴിഞ്ഞ് വീട്ടിലേക്കു വരുന്നതിനിടെ ലിഫ്റ്റ് തരാമെന്നു പറഞ്ഞ് റിബാനെ ഒരാള്‍ ബൈക്കില്‍ കയറ്റുകയായിരുന്നു. ഞായറാഴ്ച ഉച്ചയ്ക്കാണ് സംഭവം. റൂട്ട് മാറി പോകാന്‍ തുടങ്ങിയതിനെ തുടര്‍ന്ന് റിബാന്‍ ചാടിയിറങ്ങുകയായിരുന്നു. താടിയെല്ലിനും കാല്‍മുട്ടിനും പരിക്കേറ്റിട്ടുണ്ട്.
മുളിയങ്ങലില്‍നിന്ന് കായണ്ണക്കു പകരം വെള്ളിയൂര്‍ ഭാഗത്തേക്ക് റൂട്ട് മാറി പോയ പ്പോള്‍ കുട്ടി ചാടുകയായിരുന്നു. . പേരാമ്പ്രയില്‍ നിന്ന് കായണ്ണ ഭാഗത്തേക്കാണ് റിബാനു പോകേണ്ടിയിരുന്നത്. സര്‍വീസ് നടത്തുന്ന ജീപ്പിനായി കാത്തിരിക്കുമ്പോഴാണ് യുവാവ് ബൈക്കില്‍ എത്തി ലിഫ്റ്റ് തരാമെന്നു പറയുകയായിരുന്നു. എന്നാല്‍ കായണ്ണക്കു പോകേണ്ടതിനു പകരം മുളിയങ്ങല്‍ എത്തിയപ്പോള്‍ വെള്ളിയൂര്‍ ഭാഗത്തേക്കു പോകാന്‍ ശ്രമിക്കുകയായിരുന്നു.
വഴി മാറിയത് പറഞ്ഞിട്ടും വാഹനം നിര്‍ത്താത്തതിനെ തുടര്‍ന്ന് റിബാന്‍ ബൈക്കില്‍ നിന്ന് ചാടിയിറങ്ങി. ഇതിനെ തുടര്‍ന്നാണ് പരിക്കേറ്റത്. എന്നാല്‍ ബൈക്ക് നിര്‍ത്താതെ ഓടിച്ചുപോവുകയായിരുന്നു. സമീപത്തുണ്ടായിരുന്ന ആളുകളാണ് വിദ്യാര്‍ത്ഥിയെ വീട്ടിലെത്തിച്ചത്. റിബാന്‍ പേരാമ്പ്ര ഇ.എം.എസ്. സഹകരണ ആശുപത്രിയില്‍ ചികിത്സ തേടി
