കൊയിലാണ്ടി: 1994 രൂപീകൃതമായ കൊയിലാണ്ടി നഗരസഭയുടെ സ്വപ്ന പദ്ധതികളില്‍ ഒന്നായ ഷോപ്പിംഗ് കോംപ്ലക്‌സ് കെട്ടിടത്തിന്റെ നിര്‍മ്മാണം അന്തിമ ഘട്ടത്തിലേക്ക്. ഷോപ്പിംഗ് കോംപ്ലക്‌സ് കെട്ടിടത്തിന്റെ ഉദ്ഘാടനം 2025 സെപ്തംബര്‍ മാസത്തില്‍ നടത്തുന്നതിനാണ് നഗരസഭ ലക്ഷ്യമിടുന്നത്. ഷോപ്പിഗ് കോംപ്ലക്‌സിന്റെ ലേലം മാര്‍ച്ച് 12, 13 തിയ്യതികളില്‍ നഗര ഹൃദയത്തിലെ ഷോപ്പിംഗ് കോംപ്ലക്‌സ് പരിസരത്ത് നടക്കുമെന്ന് വൈസ് ചെയര്‍മാന്‍ അഡ്വ. കെ സത്യന്‍ അറിയിച്ചു.

നഗരത്തിന്റെ മുഖഛായ മാറുന്ന തരത്തില്‍ ആധുനിക സജീകരണങ്ങളോട് കൂടിയ കെട്ടിടസമുച്ചയം 21 കോടി രൂപ ചെലവില്‍ 63,000 സ്‌ക്വയര്‍ ഫീറ്റില്‍ ആറ് നിലകളായാണ് നിര്‍മ്മിച്ചിട്ടുള്ളത്.

കോഴിക്കോട് എന്‍.ഐ.ടിയാണ് കെട്ടിടത്തിന്റെ ആര്‍ക്കിടെക്ച്ചര്‍ ഡിസൈന്‍ ചെയത് പ്രവൃത്തി മോണിറ്റര്‍ ചെയ്യുന്നത്. മഞ്ചേരി ആസ്ഥാനമായി പ്രവര്‍ത്തിക്കുന്ന നിര്‍മ്മാണ്‍ കണ്‍സ്ട്രക്ഷനാണ് നിര്‍മ്മാണ പ്രവൃത്തി ഏറ്റെടുത്ത് നടത്തുന്നത്.

കെട്ടിടത്തില്‍ ഷോപ്പിംഗ് മാള്‍, ജ്വല്ലറികള്‍, ഹൈപ്പര്‍ മാര്‍ക്കറ്റ് ബ്രാന്‍ഡഡ് ഫാഷന്‍ ഷോപ്പുകള്‍, കോണ്‍ഫറന്‍സ് ഹാള്‍, മള്‍ട്ടി പ്ലക്‌സ് തിയ്യേറ്റര്‍, ഫുഡ് കോര്‍ട്ട്, കടലിലേക്ക് കാഴ്ചയുള്ള സീ വ്യൂ റൂഫ് ടോപ്പ്, ചില്‍ഡ്രന്‍ ഫണ്‍ ഏരിയ എന്നിവയ്ക്ക് ആവശ്യമായ സ്ഥല സൗകര്യങ്ങള്‍ ഒരുക്കിയിട്ടുണ്ട്. താഴത്തെ നിലയില്‍ നൂറു കാറുകള്‍ക്കും 300 ബൈക്കുകള്‍ക്കും പാര്‍ക്ക് ചെയ്യാനുള്ള സൗകര്യമുണ്ട്.