യു.എ.ഇയില്‍ തലശ്ശേരി സ്വദേശിയടക്കം രണ്ട് മലയാളികളുടെ വധശിക്ഷ നടപ്പാക്കി; ഇരുവരും ശിക്ഷിക്കപ്പെട്ടത് കൊലപാതകക്കുറ്റത്തിന്
അബുദാബി: യു.എ.ഇയില്‍ തലശ്ശേരി സ്വദേശിയടക്കം രണ്ടുപേരെ വധശിക്ഷയ്ക്ക് വിധേയരാക്കിയത് കൊലക്കുറ്റം ആരോപിച്ച്. കണ്ണൂര്‍ തയ്യില്‍ സ്വദേശി പെരുംതട്ട വളപ്പില്‍ മുരളീധരന്‍ (43), തലശ്ശേരി സ്വദേശി അരങ്ങിലോട്ട് തെക്കെ പറമ്പില്‍ മുഹമ്മദ് റിനാഷ് എന്നിവരുടെ വധശിക്ഷയാണ് നടപ്പാക്കിയത്.
2023ല്‍ യു.എ.ഇ പൗരനെ കൊലപ്പെടുത്തിയ കേസിലാണ് മുഹമ്മദ് റിനാഷിനെ ശിക്ഷിച്ചത്. വീട്ടിലെ ഒരംഗവുമായുള്ള റിനാഷിന്റെ പ്രണയം ചോദ്യം ചെയ്തതുമായി ബന്ധപ്പെട്ടുണ്ടായ വാക്കുതര്‍ക്കം കൊലപാതകത്തില്‍ കലാശിക്കുകയായിരുന്നു. റിനാഷിന്റെ മൃതദേഹം അവസാനമായി കാണാന്‍ ബന്ധുക്കള്‍ യു.എ.ഇയില്‍ എത്തിയിട്ടുണ്ട്.
2009ലാണ് മുരളീധരനെ വധശിക്ഷയ്ക്ക് വിധിച്ചത്. മോഷണ ശ്രമത്തിനിടെ മൊയ്തീനെ കൊലപ്പെടുത്തി മരുഭൂമിയില്‍ കുഴിച്ചിടുകയായിരുന്നു. മൊയ്തീനെ കാണാതായതിനെ തുടര്‍ന്ന് കുടുംബം നല്‍കിയ പരാതിയില്‍ അന്വേഷണത്തിനിടെ മൊയ്തീന്റെ ഫോണില്‍ മറ്റൊരു സിം പ്രവര്‍ത്തിക്കുന്നതായി കണ്ടെത്തി. ഇതിന്റെ പിന്‍പറ്റി നടത്തിയ അന്വേഷണമാണ് മുരളീധരനിലേക്ക് എത്തിയത്.
മൊയ്തീന്റെ കയ്യില്‍ നിന്ന് തട്ടിയെടുത്ത ഫോണ്‍ മുരളീധരന്‍ ഉപയോഗിക്കുകയായിരുന്നു. മുരളീധരന്റെ പിതാവിന്റെ പേരില്‍ എടുത്ത സിം ആണ് മൊയ്തീന്റെ ഫോണില്‍ ഇട്ടിരുന്നത്. അന്വേഷണ ഉദ്യോഗസ്ഥര്‍ സിംകാര്‍ഡ് ഉടമയെ തേടിയെത്തിയപ്പോഴാണ് ഫോണ്‍ ഉപയോഗിക്കുന്നത് മുരളീധരനാണെന്ന് മനസിലായത്.