പയ്യോളി: പി.എസ് സഞ്ജീവ് പുതിയ എസ്.എഫ്.ഐ സംസ്ഥാന സെക്രട്ടറി. പയ്യോളി സ്വദേശിയായ സഞ്ജീവ് നിലവില്‍ കണ്ണൂര്‍ ജില്ലാ സെക്രട്ടറിയാണ്. സി.പി.എം പാനൂര്‍ ഏരിയാ കമ്മിറ്റി അംഗവുമാണ്. ആലപ്പുഴയില്‍ നിന്നുള്ള എം. ശിവപ്രസാദിനെ പ്രസിഡന്റായും സംസ്ഥാന സമ്മേളനം തെരഞ്ഞെടുത്തു.

പി.എം ആര്‍ഷോക്കും അനുശ്രീക്കും പകരമാണ് പുതിയ ഭാരവാഹികള്‍. നാല് ദിവസത്തെ സംസ്ഥാന സമ്മേളനം ഇന്ന് സമാപിക്കും. രാജ്യത്തെ ഉന്നത വിദ്യാഭ്യാസ മേഖലയിലെ കാവിവത്കരണം ചെറുക്കുക എന്നീ പ്രമേയങ്ങളും സമ്മേളനം പാസാക്കി.

പയ്യോളി ഭജനമഠം സ്വദേശി പൂളക്കണ്ടി സദാനന്ദന്റെയും സുജാതയുടെയും മകനാണ് സഞ്ജീവ്. അമ്മയുടെ വീടായ പാനൂരിലാണ് രാഷ്ട്രീയ രംഗത്ത് സജീവമായി പ്രവര്‍ത്തിക്കുന്നത്. കണ്ണൂര്‍ എസ്.എന്‍.കോളേജില്‍ നിന്നും ബി.എ. എക്‌ണോമിക്‌സില്‍ ബിരുദം നേടിയശേഷം കണ്ണൂര്‍ യൂണിവേഴ്‌സിറ്റി പാലയാട് ക്യാമ്പസില്‍ എല്‍.എല്‍.ബി പൂര്‍ത്തിയാക്കി. കൂത്തുപറമ്പിലായിരുന്നു ഹൈസ്‌കൂള്‍ ഹയര്‍ സെക്കണ്ടറി പഠനം.

അച്ഛന്റെ ജോലിയുമായി ബന്ധപ്പെട്ട് തിരുവനന്തപുരത്തായിരുന്നതിനാല്‍ പ്രാഥമിക വിദ്യാഭ്യാസം അവിടെയായിരുന്നു. കണ്ണൂരിലേക്ക് വന്നശേഷമാണ് രാഷ്ട്രീയ രംഗത്ത് സജീവമായത്.