ആനയുടെ രക്തപരിശോധനയില്‍ മദപ്പാടിനുള്ള സാധ്യത കണ്ടെത്തി, പടക്കം പൊട്ടിച്ചത് അലക്ഷ്യമായി; മണക്കുളങ്ങര ക്ഷേത്രത്തില്‍ ആനയിടഞ്ഞ സംഭവത്തില്‍ ഗുരുതര വീഴ്ചയെന്ന് ചീഫ് ഫോറസ്റ്റ് കണ്‍സര്‍വേറ്ററുടെ റിപ്പോര്‍ട്ട്
കൊയിലാണ്ടി: കുറുവിലങ്ങാട് മണക്കുളങ്ങര ക്ഷേത്രത്തില്‍ ആനയിടഞ്ഞ് മൂന്ന് പേര്‍ മരിച്ച സംഭവത്തില്‍ ഗുരുതര വീഴ്ചയെന്ന് റിപ്പോര്‍ട്ട്. സോഷ്യല്‍ ഫോറസ്ട്രി കണ്‍സര്‍വേറ്റര്‍ ആര്‍.കീര്‍ത്തി നല്‍കിയ അന്തിമ റിപ്പോര്‍ട്ടിലാണ് നാട്ടാന പരിപാലന ചട്ടത്തില്‍ വീഴ്ചവരുത്തിയെന്നതടക്കമുള്ള കാര്യങ്ങള്‍ ചൂണ്ടിക്കാട്ടുന്നത്.
ഗുരുവായുര്‍ പീതാംബരന്‍ എന്ന ആനയ്ക്ക് മറ്റ് ആനകളെ ഉപദ്രവിക്കുന്ന സ്വഭാവം നേരത്തേ ഉണ്ടെന്നാണ് റിപ്പോര്‍ട്ടില്‍ പറയുന്നത്. ആനയുടെ രക്തപരിശോധനയില്‍ മദപ്പാടിനുള്ള സാധ്യതയും കണ്ടെത്തി. ഘോഷയാത്രയുടെ സമയത്ത് ആനയുടെ കാലില്‍ ചങ്ങലയുണ്ടായിരുന്നില്ലയെന്നും റിപ്പോര്‍ട്ടില്‍ പറയുന്നു.
എഴുന്നെള്ളിപ്പിനായി കൊണ്ടുവന്ന പീതാബരന്‍, ഗോകുല്‍ എന്നീ ആനകളുടെ ടെസ്റ്റോസ്റ്റിറോണ്‍ പരിശോധന അപകടശേഷം നടത്തിയിരുന്നു. പീതാബംരനില്‍ ഈ ഹോര്‍മോണിന്റെ അളവ് നാല് മടങ്ങ് അധികമാണെന്നാണ് കണ്ടെത്തല്‍. ടെസ്റ്റോസ്റ്റിറോണ്‍ കൂടിയാല്‍ ആനകളില്‍ മദപ്പാടിനുള്ള സാധ്യതയുണ്ടാകും. മുന്‍പ് അഞ്ച് തവണ ഗുരുവായൂര്‍ പീതാംബരന്‍ സമാനരീതിയില്‍ ഇടയുകയും സമീപത്തുണ്ടായിരുന്ന ആനകളെ ആക്രമിച്ച ചരിത്രവും ഉണ്ടെന്നാണ് റിപ്പോര്‍ട്ടില്‍ പറയുന്നത്.
ഇത്തരത്തിലുള്ള ഒരാനയെ എഴുന്നള്ളില്‍ പങ്കെടുപ്പിക്കാന്‍ പാടില്ലായിരുന്നു. ക്ഷേത്രത്തില്‍ അലക്ഷ്യമായി പടക്കങ്ങള്‍ പൊട്ടിച്ചിരുന്നു. ഈ ശബ്ദത്തില്‍ പീതാംബരന്‍ പ്രകോപിതനായെന്നും റിപ്പോര്‍ട്ടിലുണ്ട്. ആനകള്‍ തമ്മില്‍ കൃത്യമായ അകലം പാലിക്കണമെന്ന നിബന്ധന പാലിക്കപ്പെട്ടില്ലെന്നും ഫോറസ്റ്റ് കണ്‍സര്‍വേറ്ററുടെ റിപ്പോര്‍ട്ടില്‍ പറയുന്നു.
ഭാവിയില്‍ ഇത്തരം സംഭവങ്ങള്‍ ആവര്‍ത്തിക്കാതിരിക്കാന്‍ ആറിന നിര്‍ദേശങ്ങളും റിപ്പോര്‍ട്ടില്‍ മുന്നോട്ടുവെച്ചിട്ടുണ്ട്. ആനകള്‍ തമ്മില്‍ സുരക്ഷിതമായ അകലം പാലിക്കണം. ആനകളുടെ പരിസരത്ത് പടക്കം പൊട്ടിക്കുന്നത് നിയന്ത്രിക്കണം തുടങ്ങിയ നിര്‍ദേശങ്ങളാണ് മുന്നോട്ടുവെച്ചത്.
കൊയിലാണ്ടി കുറുവങ്ങാട് മണക്കുളങ്ങര ക്ഷേത്രത്തിലെ ഉത്സവത്തിനിടെയാണ് ആന ഇടഞ്ഞത്. എഴുന്നള്ളിപ്പ് തുടങ്ങുന്നതിന് തൊട്ടുമുമ്പായി പടക്കം പൊട്ടിച്ചതോടെ ഗുരുവായൂര്‍ പീതാംബരന്‍ എന്ന ആന ഇടയുകയായിരുന്നു. പിന്നീട് ഈ ആന തൊട്ടടുത്ത് നിന്ന മറ്റൊരു ആനയെ കുത്തി. ആന വിരണ്ടോടിയപ്പോള്‍ അടുത്തുണ്ടായിരുന്ന ആളുകളും ചിതറിയോടുകയും ഓഫീസ് കെട്ടിടത്തില്‍ ഇടിച്ച് കെട്ടിടം തകരുകയും ചെയ്തു. തകര്‍ന്നുവീണ കെട്ടിടത്തിനടിയില്‍പ്പെട്ടും തുടര്‍ന്നുണ്ടായ തിക്കിലും തിരക്കിലും പെട്ടും മൂന്നുപേര്‍ മരിച്ചിരുന്നു.