കുറ്റ്യാടി: ചെറിയ കുമ്പളത്ത് സ്വകാര്യ ബസ് തെറ്റായ ദിശയിലേക്ക് നീങ്ങി കാറിനെ ഇടിക്കുന്ന ദൃശ്യങ്ങള്‍ പുറത്ത്. ഇന്നലെ രാത്രി ഏഴ് മണിയോടെ ചെറിയ കുമ്പളത്തായിരുന്നു അപകടം. കോഴിക്കോട് നിന്നും കുറ്റ്യാടി ഭാഗത്തേക്ക് വരികയായിരുന്ന ബ്രഹ്‌മാസ്ത്രം എന്ന ബസാണ് എതിര്‍ദിശയിലേക്ക് വരികയായിരുന്ന കാറിന് ഇടിച്ചത്.

കുമ്പളം സ്റ്റാന്റില്‍ ആളെ ഇറക്കിയശേഷം ബസ് മുന്നോട്ടുനീങ്ങവേ അപ്രതീക്ഷിതമായി വലതുദിശയിലേക്ക് കയറ്റുകയായിരുന്നു. ഇടിയുടെ ആഘാതത്തില്‍ കാറും റോഡരികില്‍ നിര്‍ത്തിയിട്ട ഓട്ടോറിക്ഷയും സമീപത്തെ കടയുടെ വരാന്തയിലേക്ക് നീങ്ങി.

കാറില്‍ നാല് യാത്രക്കാരുണ്ടായിരുന്നു. യാത്രക്കാര്‍ക്ക് പരിക്കില്ല. വാഹനത്തിന് ഗുരുതരമായ കേടുപാടുകള്‍ സംഭവിച്ചിട്ടുണ്ട്. നാദാപുരം സ്വദേശികളാണ് കാറിലുണ്ടായിരുന്നത്.