കാലവര്‍ഷം ശക്തിപ്രാപിക്കുന്നു; കോഴിക്കോടുള്‍പ്പെടെ 10 ജില്ലകളില്‍ ഇന്ന് യെല്ലോ അലേര്‍ട്ട്
തിരുവനന്തപുരം: സംസ്ഥാനത്ത് മഴ ശക്തിപ്രാപിക്കുന്നതായി കാലാവസ്ഥാ കേന്ദ്രം. ഇന്ന് കോഴിക്കോട് ജില്ലയുള്‍പ്പെടെ 10 ജില്ലകളില്‍ യെല്ലോ അലേര്‍ട്ട് പ്രഖ്യാപിച്ചു. കണ്ണൂര്‍, തൃശ്ശൂര്‍, തിരുവനന്തപുരം, കൊല്ലം, പത്തനംതിട്ട, ആലപ്പുഴ, കോട്ടയം, ഇടുക്കി, എറണാകുളം എന്നിവിടങ്ങളാണ് മഴ മുന്നറിയിപ്പുള്ള മറ്റ് ജില്ലകള്‍.
അതേസമയം, സംസ്ഥാനത്ത് കനത്ത മഴയില്‍ പലയിടത്തും നാശനഷ്ടമുണ്ടായി. കുറ്റ്യാടിയില്‍ സ്വകാര്യ സ്‌കൂളിന്റെ മതില്‍ തകര്‍ന്ന് കാറിന് മുകളില്‍ വീണു. യാത്രക്കാര്‍ക്ക് പെട്ടെന്ന് പുറത്തിങ്ങാന്‍ കഴിഞ്ഞതിനാല്‍ പരിക്കേറ്റില്ല. കനത്ത മഴയില്‍ എറണാകുളം കളമശ്ശേരി ടി.വി.എസ് ജംഗ്ഷനില്‍ മരം വീണു.റോഡില്‍ ഏറെ നേരം ഗതാഗതം തടസപ്പെട്ടു. ഫയര്‍ഫോഴ്സെത്തിയാണ് തടസം നീക്കിയത്.
തിരുവനന്തപുരം മുതലപ്പൊഴിയില്‍ വള്ളം മറിഞ്ഞ് അപകടത്തില്‍പ്പെട്ട 8 മത്സ്യത്തൊഴിലാളികളെ രക്ഷപ്പെടുത്തി. ഒരാഴ്ചയ്ക്കിടെ രണ്ടാം തവണയാണ് മുതലപ്പൊഴിയില്‍ വള്ളം മറിയുന്നത്.
കടല്‍ പ്രക്ഷുബ്ധമാകാന്‍ സാധ്യതയുള്ളതിനാല്‍ ബുധനാഴ്ച വരെ മത്സ്യബന്ധനത്തിന് നിരോധനം ഏര്‍പ്പെടുത്തി.