കൊയിലാണ്ടി: ബപ്പങ്ങാട് ഈസ്റ്റ് റോഡില്‍ പലവ്യഞ്ജന കടയില്‍ കള്ളന്‍ കയറി. കോമത്ത്കര വാളിപ്പറിമ്പില്‍ രവീന്ദ്രന്റെ പി.എം.കെ കടയിലാണ് പുലര്‍ച്ചയോടെ കള്ളന്‍ കയറിയത്. രണ്ടു മറിയുള്ള കടയില്‍ ലോട്ടറിയും വില്‍ക്കുന്നുണ്ട്. ലോട്ടറികളും, മേശയില്‍ സൂക്ഷിച്ച 5000 രൂപയും 5000 രൂപയുടെ സിഗരറ്റും മോഷണം പോയിട്ടുണ്ട്.

ഷട്ടറിന്റെ പൂട്ട് പൊളിച്ചാണ് കള്ളന്‍ അകത്തു കയറിയത്. തൊട്ടടുത്ത നന്ദന സ്പയര്‍പാര്‍ട്‌സ് കടയിലും കള്ളന്‍ കയറാന്‍ ശ്രമം നടത്തിയിട്ടുണ്ട്. എന്നാല്‍ ആ കടയ്ക്ക് സെന്‍ട്രല്‍ ലോക്കുണ്ടായിരുന്നതിനാല്‍ പൂട്ട് പൊളിക്കാന്‍ സാധിക്കാതെ വരികയായിരുന്നു. ഇന്നലെ രാത്രി 9 മണിയോടെയോടെ കട പൂട്ടിയിരുന്നു.

രാവിലെ ഏഴ് മണിയോടെ കട തുറക്കാനെത്തിയ രവീന്ദ്രനാണ് ഷട്ടര്‍ തുറന്ന നിലയില്‍ കണ്ടത്. ഉടന്‍ തന്നെ സമീപത്തെ കടകളിലുള്ളവര്‍ എത്തുകയും കൊയിലാണ്ടി പോലീസിനെ വിവരം അറിയിക്കുകയും ചെയ്തു. പോലീസ് സ്ഥലത്തെത്തി പരിശോധന നടത്തി.