മുംബൈ: സയ്യിദ് മുഷ്താഖ് അലി ട്രോഫി ടൂര്‍ണമെന്റില്‍ സിക്കിമിനെതിരായ മത്സരത്തില്‍ കേരളത്തിന് തകര്‍പ്പന്‍ ജയം. 20 ഓവറുകളില്‍ നിന്നായി കേരളം 221 റണ്‍സ് നേടി. മത്സരത്തില്‍ ടോസ് നേടിയ കേരളം ബാറ്റിംഗ് തിരഞ്ഞെടുക്കുകയായിരുന്നു.

രോഹന്‍ എസ്.കുന്നുമ്മലിന്റെ അതിവേഗ സെഞ്ച്വറിയാണ് കേരളത്തിന് തകര്‍പ്പന്‍ ജയം നേടിക്കൊടുത്തത്. അവസാന പന്തില്‍ ബൗണ്ടറി നേടിയാണ് രോഹന്‍ സെഞ്ച്വറി പൂര്‍ത്തിയാക്കിയത്. 56 പന്തുകളില്‍ നിന്നായി രോഹന്‍ 101 റണ്‍സ് നേടി. 14 ഫോറുകളും രണ്ട് സിക്‌സുകളുമാണ് താരം നേടിയത്. ഗ്രൂപ്പ് ബിയില്‍ അഞ്ച് കളികളില്‍ അഞ്ചും ജയിച്ച കേരളത്തിന് നിലവില്‍ 20 പോയിന്റുകളുണ്ട്.

അര്‍ധ സെഞ്ച്വറി നേടി വിഷ്ണു വിനോദ് പുറത്തായി. 43 പന്തുകളില്‍ നിന്നായി വിഷ്ണു 79 റണ്‍സ് നേടി. ക്യാപ്റ്റന്‍ സഞ്ജു സാംസൺ ബാറ്റിങ്ങിന് ഇറങ്ങിയില്ല. മറുപടി ബാറ്റിങ്ങിനിറങ്ങിയ സിക്കിം 20 ഓവറില്‍ ഒന്‍പത് വിക്കറ്റ് നഷ്ടത്തില്‍ 89 റണ്‍സ് നേടി. 21 പന്തില്‍ 26 റണ്‍സ് സ്വന്തമാക്കിയ അങ്കുര്‍ മാലിക്കാണ് സിക്കിമിന്റെ ടോപ് സ്‌കോറര്‍. ഒഡീഷ, അസം എന്നിവര്‍ക്കെതിരെയാണ് കേരളത്തിന് ഇനി മത്സരം ബാക്കിയുള്ളത്.