കൊയിലാണ്ടി: കുറവങ്ങാട് പോസ്റ്റ് ഓഫീസിന് സമീപം പിക്കപ്പ് ലോറി ഇടിച്ച് അപകടം. അപകടത്തില്‍ എസ്റ്റേറ്റ് മുക്ക് സ്വദേശികളായ ബൈക്ക് യാത്രക്കാര്‍ക്കും ലോറി ഡ്രൈവര്‍ക്കും പരിക്കേറ്റു. അബൂബക്കര്‍ (54), അബ്ദുള്‍ റഹ്‌മാന്‍ (64), കരീം(49) എന്നിവര്‍ക്കാണ് പരിക്കേറ്റത്. ഇന്ന് വൈകിട്ടോടെയാണ് സംഭവം.

കുറുവങ്ങാട് പോസ്റ്റ് ഓഫീസിനു സമീപത്തെ പാത്രക്കടയുടെ മുന്നില്‍ വെച്ചായിരുന്നു അപകടം. താമരശ്ശേരിയില്‍ നിന്നും കൊയിലാണ്ടിയിലേക്ക് മീനും കയറ്റി പോവുകയായിരുന്ന പിക്കപ്പ് ലോറി എതിരെ വന്ന ബൈക്ക് യാത്രക്കാരെ ഇടിച്ചു വീഴ്ത്തുകയായിരുന്നു.

ലോറി ഡ്രൈവര്‍ ഉറങ്ങിപ്പോയതാണ് അപകടത്തിന് കാരണമെന്നാണ് നാട്ടുകാര്‍ പറയുന്നത്. പരിക്കേറ്റവരെ കൊയിലാണ്ടി താലൂക്ക് ആശുപത്രിയില്‍ പ്രവേശിപ്പിച്ചിരിക്കുകയാണ്.