പയ്യോളി: പയ്യോളിയിൽ ഇനി കലയുടെ ആഘോഷ നാളുകൾക്കായുള്ള ഒരുക്കങ്ങൾ ആരംഭിക്കുകയാണ്. കേരളോത്സവം തീയതികൾ പ്രഖ്യാപിച്ചു. നവംബർ 12 നാണു കേരളോത്സവം ആരംഭിക്കുന്നത്. 20 ന് സമാപിക്കും.

കലാ കായിക ഗെയിംസ് മത്സരങ്ങളിൽ പങ്കെടുക്കുന്ന വ്യക്തികൾക്കും ടീമുകൾക്കുമുള്ള അപേക്ഷ ഫോറം നവംബർ 8 മുതൽ നഗരസഭയിൽ നിന്നും ലഭ്യമാകും എന്ന് അധികൃതർ അറിയിച്ചു. അപേക്ഷകൾ നഗരസഭയിൽ നൽകേണ്ട അവസാന തീയ്യതി നവംബർ 10 ന് 5 മണി വരെയാണ്.

നനഗരസഭ തല കേരളോത്സവം നടത്തുന്നതിന് മുന്നോടിയായി വിപുലമായ സംഘാടക സമിതി രൂപീകരിച്ചു. സ്വാഗത സംഘ രൂപീകരണ യോഗം നഗരസഭ ചെയർമാൻ വടക്കയിൽ ഷഫീഖ് ഉദ്ഘാടനം ചെയ്തു. യോഗത്തിൽ വിദ്യാഭ്യാസ സ്ഥിരം സമിതി ചെയർമാൻ കെ ടി വിനോദ് അധ്യക്ഷത വഹിച്ചു.

യുവജനങ്ങളുടെ കലാപരവും സാംസ്കാരികവും കായികവുമായ കഴിവുകൾ പ്രകടിപ്പിക്കുന്നതിന് അവസരമൊരുക്കുക, അവരിൽ സാഹോദര്യവും സഹകരണബോധവും സഹവർത്തിത്വവും വളർത്തുക, ഒരു പൊതു സംഗമ വേദിയിൽ ഒരുമിച്ചു കൂടുന്നതിന് അവസരമൊരുക്കുക തുടങ്ങിയ ലക്ഷ്യങ്ങളുടെ സാക്ഷാത്ക്കാരത്തിനായാണ് സംസ്ഥാന സർക്കാരിന്റെ ആഭിമുഖ്യത്തിൽ കേരളോത്സവം വർഷംതോറും സംഘടിപ്പിച്ചു പോരുന്നത്. സംസ്ഥാന യുവജന ക്ഷേമ ബോർഡിന്റെ നേതൃത്വത്തിൽ തദ്ദേശ സ്വയംഭരണ സ്ഥാപനങ്ങളേയും, വിവിധ വകുപ്പുകളേയും സഹകരിപ്പിച്ചുകൊണ്ടാണ് കേരളോത്സവം സംഘടിപ്പിച്ചു വരുന്നത്.