കുറ്റ്യാടി: കുട്ടിക്കുരുന്നുകളുടെ പാട്ടും നൃത്തവും എന്നും കൗതുകമാണ്. എന്നാല്‍ അതിനിടയില്‍ അല്പം കുറുമ്പുകൂടിയായാലോ.. അതിലും ബഹുരസം! എന്നു തന്നെ പറയാം. കുറ്റ്യാടി ഗ്രാമപഞ്ചായത്ത് അംഗനവാടി കലോത്സവത്തില്‍ ഒപ്പനയില്‍ പങ്കെടുത്ത കുറച്ച് കുസൃതി കുരുന്നുകളുടെ വീഡിയോയാണ് ഇപ്പോള്‍ സോഷ്യല്‍ മീഡിയകളില്‍ വൈറലാവുന്നത്.

മണവാട്ടിയുടെ കൈപിടിച്ച് വളരെ സന്തോഷത്തോടെ വേദിയിലേക്കെത്തുന്ന തോഴിമാര്‍. പിന്നെയാണ് ഒപ്പനയുടെ അപാരതയിലേക്ക് കടക്കുന്നത്. മണവാട്ടിയെ ഇരുത്തുന്ന കസേര തെറ്റി മണവാട്ടി താഴെ… അതോടെ മണവാട്ടി കട്ടക്കലിപ്പില്‍! പിന്നീട് തോഴിമാരുടെ തമ്മിലടിയും… വൈറലായ വീഡിയോ ഇതിനോടകം തന്നെ നിരവധി പേരാണ് സോഷ്യല്‍ മീഡിയ വഴി പങ്കുവെച്ചിരിക്കുന്നത്.

വീഡിയോ കാണാം

വടയം സൗത്ത് സ്‌കൂളില്‍ വച്ചാണ് കുറ്റ്യാടി ഗ്രാമപഞ്ചായത്ത് അംഗനവാടി കലോത്സവം നടന്നത്. 20 അംഗനവാടികളില്‍ നിന്നായി 215 ഓളം കുഞ്ഞു മക്കളാണ് അംഗനവാടി കലോത്സവത്തില്‍ മാറ്റുരച്ചത്. പരിപാടിയുടെ സമാപന ചടങ്ങ് കുറ്റ്യാടി പഞ്ചായത്ത് പ്രസിഡന്റ് ഒ.ടി നഫീസ ടീച്ചര്‍ ഉദ്ഘാടനം ചെയ്തു. പരിപാടിക്ക് കുറ്റ്യാടി പഞ്ചായത്ത് വൈസ് പ്രസിഡന്റ് ടി കെ മോഹന്‍ദാസ് മാസ്റ്റര്‍ അധ്യക്ഷനായി.