കൊയിലാണ്ടി: കാപ്പാട് സ്നേഹതീരത്തിൽ സന്തോഷത്തിൻ്റെയും ആഹ്ലാദത്തിൻ്റെയും അനുഭവം പകർന്ന് തുമ്പ ഓണാഘോഷം. ഓൾ‌ഡ് ഈസ് ​ഗോൾഡ് കൊയിലാണ്ടി ആർട്സ് കോളജ് 1991-93 ബാച്ചാണ് സ്നേഹതീരം അന്തേവാസികൾക്കൊപ്പം ഓണാഘോഷങ്ങളുടെ തനിമ പകർന്നു നൽകിയ പരിപാടി സംഘടിപ്പിച്ചത്. മജീഷ്യൻ ശ്രീജിത്ത് വിയ്യൂർ മാജിക് ഷോ അവതരിപ്പിച്ച് ആഘോഷ പരിപാടി ഉദ്ഘാടനം ചെയ്തു.

സ്നേഹതീരം ഓഡിറ്റോറിയത്തിൽ നടന്ന ചടങ്ങിൽ ബാബു കുന്നത്തറ അധ്യക്ഷത വഹിച്ചു. കൊയിലാണ്ടി ആർട്സ് കോളജ് സാരഥിയായിരുന്ന പി.വി.രാജു, കെ.ടി.സദാനന്ദൻ എന്നിവരെ വേദിയിൽ ആദരിച്ചു. സബിത സ്വാഗതവും പി.കെ.സതീഷ് നന്ദിയും പറഞ്ഞു.

അഷ്റഫ് നാറാത്തിൻ്റെ നേതൃത്വത്തിൽ ടീം ആർട്ടിസ്റ്റ് വേദിയുടെ ഗാനവിരുന്ന്, എയ്ഞ്ചൽ നൃത്ത വിദ്യാലയം വിദ്യാർഥികളുടെ ദൃശ്യവിസ്മയം, അന്തേവാസികൾക്കൊപ്പം ഓണസദ്യ എന്നിവ നടന്നു.