കരിപ്പൂരില്‍ വന്‍ എം.ഡി.എം.എ വേട്ട; പിടിച്ചത് 1.66 കിലോഗ്രാം എം.ഡി.എം.എ
മലപ്പുറം: കരിപ്പൂരില്‍ വന്‍തോതില്‍ എം.ഡി.എം.എ പിടിച്ചെടുത്തു. കൊണ്ടോട്ടിയിലെ വീട്ടില്‍ നിന്ന് 1.66 കിലോഗ്രാം എം.ഡി.എം.എയാണ് പൊലീസ് പിടിച്ചെടുത്തത്. മുക്കൂട് മുല്ലാന്‍മടക്കല്‍ ആഷിഖിന്റെ വീട്ടില്‍ നിന്നാണ് പൊലീസും ഡാന്‍സാഫ് സ്‌ക്വാഡും എം.ഡി.എം.എ പിടിച്ചത്.
തിങ്കളാഴ്ച പുലര്‍ച്ചെയാണ് റെയ്ഡ് നടത്തിയത്. പിടികൂടിയ രാസലഹരിക്ക് 50 ലക്ഷത്തോളം രൂപ വിലവരും. മൊത്തവിതരണവുമായി ബന്ധപ്പെട്ട പൊലീസിന്റെ അന്വേഷണത്തിലാണ് ഇത്രയധികം രാസലഹരി പിടികൂടാനായത് എന്നാണ് സൂചന.
പ്രതിക്ക് ഒമാനില്‍ നിന്നും കഴിഞ്ഞ ദിവസം ഒരു പാഴ്‌സല്‍ വന്നിട്ടുണ്ടെന്ന് ജില്ല പൊലീസ് മേധാവിക്ക് രഹസ്യ വിവരം ലഭിച്ചിരുന്നു. ഇതിന്റെ അടിസ്ഥാനത്തില്‍ ജില്ലാ പൊലീസ് മേധാവിയുടെ നിര്‍ദേശ പ്രകാരം വീട് റെയ്ഡ് ചെയ്താണ് എം.ഡി.എം.എ പിടിച്ചെടുത്തത്. ഒമാനില്‍ നിന്ന് എം.ഡി.എം.എ കുറഞ്ഞ നിരക്കില്‍ വാങ്ങി വിമാനമാര്‍ഗം കള്ളക്കടത്തായി എത്തിച്ചായിരുന്നു ആഷിഖ് ലഹരി സംഘങ്ങള്‍ക്ക് വില്‍പന നടത്തിയിരുന്നതെന്ന് പൊലീസ് പറഞ്ഞു.
ലഹരി കേസില്‍ രണ്ട് ദിവസം മുമ്പ് മട്ടാഞ്ചേരി പൊലീസ് അറസ്റ്റ് ചെയ്തയാളാണ് ആഷിഖ്. കൊച്ചിയില്‍ നിന്ന് ജനുവരിയില്‍ എം.ഡി.എം.എ ഉള്‍പ്പെടെ മയക്കുമരുന്നുകള്‍ പിടികൂടിയ കേസിലെ ഇടനിലക്കാരനാണ് ഇപ്പോള്‍ പിടിയിലായ ആഷിഖ്.