കൊളാവിപ്പാലം: വടകര കോട്ടക്കടവില്‍ ഭാര്യ വീടിനു തീകൊളുത്തി ആത്മഹത്യയ്ക്കു ശ്രമിച്ച അന്‍പതുകാരന്‍ മരിച്ചു. കൊളാവിപ്പാലം കൂടത്താഴ സ്വദേശി അനില്‍കുമാറാണ് മരിച്ചത്.

വീടിനുനേരെ ആക്രമണം നടത്തിയശേഷം ദേഹത്ത് മണ്ണെണ്ണയൊഴിച്ച് തീകൊളുത്തുകയായിരുന്നു. തിങ്കളാഴ്ച പുലര്‍ച്ചെയായിരുന്നു സംഭവം. സാരമായി പൊള്ളലേറ്റ ഇയാള്‍ കോഴിക്കോട് മെഡിക്കല്‍ കോളേജില്‍ ചികിത്സയിലായിരുന്നു.

കോട്ടക്കടവ് പാറക്കണ്ടി റോഡ് കടുങ്ങോന്റവിട ഷാജിയുടെ വീടാണ് ഇയാള്‍ ആക്രമിച്ചത്. ഷാജിയുടെ സഹോദരീ ഭര്‍ത്താവാണ് അനില്‍കുമാര്‍. ഷാജിയും സഹോദരിയും സഹോദരി പുത്രിയും അമ്മയുമാണ് ഈ വീട്ടില്‍ താമസിച്ചിരുന്നത്. ബൈക്കില്‍ ഇവിടെയെത്തിയ അനില്‍കുമാര്‍ വീടിന്റെ മൂലകളില്‍ അട്ടിയിട്ട മരക്കഷണങ്ങളിലും മുന്നിലും പിന്നിലുമുള്ള വാതിലുകളിലും മണ്ണെണ്ണയും പെട്രോളും ഒഴിച്ച് തീകൊടുക്കുകയായിരുന്നു.

തുടര്‍ന്ന് മുറ്റത്ത് നിര്‍ത്തിയിട്ട കാറിന്റെയും സ്‌കൂട്ടറിന്റെയും ടയറിനും തീകൊളുത്തി. പത്തോലം കുപ്പികളില്‍ മണ്ണെണ്ണയും പെട്രോളും ഇയാള്‍ കൊണ്ടുവന്നിരുന്നു. തുടര്‍ന്നാണ് മണ്ണെണ്ണയൊഴിച്ച് തീകൊളുത്തിയത്.