‘സുരേന്ദ്രന് ഇവരും കൂടപ്പിറപ്പാണ്’ സഹജീവി സ്‌നേഹത്തിന്റെ ഉദാത്ത മാതൃകയുമായി കൊയിലാണ്ടി താലൂക്ക് ആശുപത്രി ജീവനക്കാരന്‍
കൊയിലാണ്ടി: സഹജീവി സ്‌നേഹത്തിന്റെ ഉദാത്ത മാതൃക തീര്‍ക്കുകയാണ് കൊയിലാണ്ടി താലൂക്ക് ആശുപത്രി ജീവനക്കാരനായ സുരേന്ദ്രന്. ആശുപത്രി പരിസരത്ത് അലഞ്ഞു തിരിയുന്ന നായകള്‍ക്ക് ഭക്ഷണം നല്‍കിയാണ് സുരേന്ദ്രന് മാതൃകയാവുന്നത്. ഏറെ കാലമായി തുടരുന്ന ഈ ഉദ്യമം ആഘോഷനാളുകളിലും അദ്ദേഹം മുടക്കാറില്ല. വിഷു ദിവസമായ ഇന്നും ആശുപത്രി പരിസരത്തെത്തി ബിസ്‌ക്കറ്റും വെള്ളവും വാങ്ങി നല്‍കി തന്റെ ദൗത്യം അദ്ദേഹം നിര്‍വ്വഹിച്ചു.
നായകള്‍ക്ക് മാത്രമല്ല ആശുപത്രിയിലെത്തുന്ന അപകട കേസുകളിലെല്ലാം ഓടിയെത്തി ആവശ്യമായ സൗകര്യങ്ങള്‍ ഏര്‍പ്പെടുത്തുന്നതിലും സുരേന്ദ്രന് മാതൃകാപരമായ പ്രവര്‍ത്തനമാണ് നടത്തുന്നതെന്ന് സഹപ്രവര്‍ത്തകര്‍ പറഞ്ഞു. താലൂക്ക് ആശുപത്രിയിലെ ഗ്രേഡ്-2 ജീവനക്കാരനാണ് സുരേന്ദ്രന്.
