കൊയിലാണ്ടി: കഞ്ചാവുമായി കൊയിലാണ്ടി സ്വദേശി പിടിയിൽ. ചേമഞ്ചേരി മേനാമ്പറത്ത് മനുവിനെയാണ്(22) പോലീസ് പിടികൂടിയത്. വാഹന പരിശോധനക്കിടയിലാണ് യുവാവിന്റെ കയ്യിൽ നിന്ന് കഞ്ചാവ് കണ്ടെടുത്തത്. കൊയിലാണ്ടി എസ്.ഐ എം.എൽ അനൂപും സംഘവുമാണ് ഇന്നലെ അർദ്ധരാത്രിയോടെ പ്രതിയെ പിടികൂടിയത്.

[ad2]

കഞ്ചാവ് അളക്കാൻ ഉപയോഗിക്കുന്ന മിനി ഡിജിറ്റിൽ ത്രാസും, ഐഫോണും 4900 രൂപയും ഇയാളിൽ നിന്നും പിടികൂടി. ഇയാൾ കഞ്ചാവ് കച്ചവടം നടത്തുന്ന ആളാണെന്നും കച്ചവടം കഴിഞ്ഞു തിരികെ വരുമ്പോഴാണ് ഇയാളെ പിടികൂടിയതെന്നും എസ്.ഐ അനൂപ് കൊയിലാണ്ടി ന്യൂസ് ഡോട്ട് കോമിനോട് പറഞ്ഞു. പതിനഞ്ചു ഗ്രാം കഞ്ചാവാണ് ഇയാളിൽ നിന്ന് കണ്ടെടുത്തത്. കഞ്ചാവ് അളക്കാൻ ഉപയോഗിക്കുന്ന ഇലക്ട്രോണിക് ത്രാസ്സിനോടൊപ്പം ഇത് നൽകുന്ന ചെറിയ പാക്കറ്റുകളും കണ്ടെടുത്തു.

[ad1]

നേരത്തെ തന്നെ ഇയാളെ പോലീസ് നിരീക്ഷിച്ചു വരുകയായിരുന്നു. ഇതിനിടയിലാണ് തിരുവങ്ങൂരിൽ വാഹന പരിശോധന നടത്തവെ യുവാവ് പിടിയിലാവുന്നത്. എസ്.ഐ അനൂപിന്റെ നേതൃത്വത്തിൽ എ.എസ്.ഐ രമേശൻ, എസ്.സി.പി.ഓ ബിനീഷ്, സി.പി.ഓ രാജേഷ് എന്നിവരടങ്ങുന്ന സംഘമാണ് പ്രതിയെ പിടികൂടിയത്. യുവാവിനെ കോടതിയിൽ ഹാജരാക്കിയെങ്കിലും പ്രതിയെ ജാമ്യത്തിൽ വിട്ടു.

————-