കൊയിലാണ്ടി: വിദ്യാർത്ഥികളിലെ നൂതന ശാസ്ത്രാശയങ്ങൾ കണ്ടെത്തുന്നതിന് വേണ്ടി കേന്ദ്ര ശാസ്ത്ര സാങ്കേതിക വകുപ്പ് ഏർപ്പെടുത്തിയ ഇൻസ്പെയർ അവാർഡ് തിളക്കത്തിൽ കാവുംവട്ടം യു.പി സ്കൂൾ. ആറാം ക്ലാസ് വിദ്യാർത്ഥികളായ ശ്രേയ കൃഷ്ണ എസ്.എ, വൈഗ വി.എസ് എന്നിവർക്കാണ് അവാര്‍ഡ്‌. ഇത് രണ്ടാം തവണയാണ് ഇൻസ്പെയർ അവാർഡ് നേട്ടം കാവുംവട്ടം യു.പി സ്കൂളിനെ തേടിയെത്തുന്നത്.

ദൂരയാത്രകൾ നടത്തുന്നവർക്ക് സഹായകരമായ ലഗേജ് സംവിധാനം രൂപകൽപ്പന ചെയ്താണ് വൈഗ ഈ നേട്ടത്തിന് അർഹയായത്. വീട്ടമ്മമാർക്ക് അനായാസേന ഉപയോഗിക്കാവുന്ന പരിസര മലിനീകരണം കുറയ്ക്കുന്ന അടുപ്പ് ഡിസൈനിലൂടെയാണ് ശ്രേയ അവാർഡ് നേടിയെടുത്തത്. പതിനായിരം രൂപയും പ്രശസ്തിപത്രവും അടങ്ങുന്നതാണ് അവാർഡ്.

മരുതൂർ എളയിടത്ത് മഠത്തിൽ വികാസിന്റെയും ശ്വേതയുടെയും മകളാണ്‌ വൈഗ വി.എസ്. ഒറ്റക്കണ്ടം മേക്കോടി മീത്തൽ സുരേഷിന്റെയും അബിതയുടെയും മകളാണ്‌ ശ്രേയ കൃഷ്ണ. സ്‌കൂള്‍ പ്രധാനധ്യാപകൻ പ്രതീഷ് മാസ്റ്റർ, സയൻസ് ക്ലബ്ബ് കൺവീനർ സബിന ടീച്ചർ, സ്‌കൂളിലെ മറ്റ്‌ അധ്യാപകര്‍ എന്നിവരെല്ലാം കുട്ടികള്‍ക്ക് മികച്ച പിന്തുണയുമായി കൂടെയുണ്ട്‌.

Description: Kavumvattom UP School shines again in the Inspire Award;