നന്തി ബസാര്‍: എം ചേക്കുട്ടി ഹാജി സ്മാരക സൗധം കോടിക്കല്‍ ശാഖ മുസ്ലിംലീഗ് ആസ്ഥാന മന്ദിരത്തിന്റെ ഉദ്ഘാടനം ഡിസംബര്‍ 24,25 തിയ്യതികളില്‍. ഇതിന്റെ ഭാഗമായി സമ്മേളന പ്രഖ്യാപന കണ്‍വന്‍ഷനും സ്വാഗതസംഘ രൂപീകരണ യോഗവും സംഘടിപ്പിച്ചു. കോടിക്കല്‍ക്കുന്നുമ്മല്‍ താഴെ എഫ്.എം ഫൈസല്‍ നഗറില്‍ വെച്ചാണ് ഉദ്ഘാടനം നടക്കുക.

യോഗം മൂടാടി പഞ്ചായത്ത് മുസ്ലിംലീഗ് പ്രസിഡണ്ട് സി.കെ അബൂബക്കര്‍ ഉദ്ഘാടനം ചെയ്തു. സമ്മേളനത്തിന്റെ വിജയത്തിന് പി.കെ ഹുസൈന്‍ ഹാജി ചെയര്‍മാനും കെ.പി കരീം ജനറല്‍ കണ്‍വീനറും പി ബഷീര്‍ ട്രഷററുമായ 101 അംഗ സ്വാഗതസംഘ കമ്മിറ്റി രൂപികരിച്ചു. സമ്മേളനത്തിന്റെ ഭാഗമായി വിദ്യാര്‍ത്ഥി യുവജന സമ്മേളനം, വനിതാ സമ്മേളനം, പ്രകടനം, പൊതു സമ്മേളനം എന്നിവ നടക്കും.

പാണക്കാട് സാദിഖലി ശിഹാബ് തങ്ങള്‍,പി.കെ കുഞ്ഞാലികുട്ടി,കെ.എം ഷാജി,ടി.ടി ഇസ്മായില്‍, തുടങ്ങി സംസ്ഥാന ജില്ലാ മണ്ഡലം നേതാക്കള്‍ പരിപാടിയില്‍ സംബന്ധിക്കും. യോഗത്തില്‍ പി.കെ ഹുസൈന്‍ ഹാജി അധ്യക്ഷത വഹിച്ചു. കെ.പി കരീം, പി ബഷീര്‍, പി.കെ മുഹമ്മദലി, മന്നത്ത് മജീദ്, പി. റഷീദ, കെ.വി ഹംസ, ടി. നൗഷാദ് എന്നിവര്‍ സംസാരിച്ചു. പഞ്ചായത്ത് മുസ്ലിംലീഗ് ട്രഷറര്‍ വര്‍ദ് അബ്ദുറഹ്‌മാന്‍ സമ്മേളന പ്രവര്‍ത്തന ഫണ്ട് ഉദ്ഘാടനം ചെയ്തു. യൂസഫ് ദാരിമി ഖിറാഅത്ത് നടത്തി.