കോഴിക്കോട്: എലത്തൂരില്‍ പെട്രോളിയം ഡിപ്പോയില്‍ ഇന്ധന ചോര്‍ച്ച. ഹിന്ദുസ്ഥാന്‍ പെട്രോളിയം കോര്‍പറേഷന്റെ ഡിപ്പോയില്‍ നിന്നാണ് ഇന്ധനം ചോര്‍ന്നത്. ഇന്ന് വൈകുന്നേരം നാല് മണിയോടെയാണ് ഓവുചാലിലൂടെ ഇന്ധനം ഒഴുകുന്നത് നാട്ടുകാരുടെ ശ്രദ്ധയില്‍പെട്ടത്.

നാട്ടുകാര്‍ ഓവുചാലില്‍ നിന്നും കുപ്പിയില്‍ ഇന്ധനം ശേഖരിച്ച് പരിശോധിച്ചപ്പോഴാണ് ഡീസലും പെട്രോളുമാണെന്ന് മനസിലായത്. തുടര്‍ന്ന് അഗ്നിരക്ഷാ സേനയെ വിവരം അറിയിച്ചു. വിവരമറിയച്ചതിനെ തുടര്‍ന്ന് അഗ്നിരക്ഷാ സേന സ്ഥലത്തെത്തി നാട്ടുകാരുടെ സഹായത്തോടെ ഇന്ധനം ഓവുചാലില്‍ നിന്നും മാറ്റുകയാണ്.

ഏതാണ്ട് ഒരുകിലോമീറ്ററോളം ഇന്ധനം ഒഴുകിയിട്ടുണ്ട്. സമീപത്തെ വീടുകളിലെ കിണറുകളിലേക്ക് എത്താന്‍ സാധ്യതയുള്ളതിനാല്‍ ഇന്ധനം എത്രയും പെട്ടെന്ന് ഓവുചാലില്‍ നിന്നും നീക്കാനുള്ള ശ്രമങ്ങള്‍ തുടരുകയാണ്.