കൊയിലാണ്ടി: ഓടിക്കൊണ്ടിരിക്കെ ബസിൽ നിന്നും തീയും പുകയും ഉയർന്നത് യാത്രക്കാരെ പരിഭ്രാന്തരാക്കി. കോഴിക്കോടേക്ക് പോവുകയായിരുന്ന കെ.എസ്.ആർ.ടിസി ബസിലായിരുന്നു സംഭവം. എഞ്ചിനിൽ നിന്നും തീയും പുകയും ഉയരുന്നത് ശ്രദ്ധയിൽപെട്ട ഉടനെ യാത്രക്കാരെ ബസിൽ നിന്നിറക്കി. ഇന്ന് രാവിലെ 8.45 ഓടെ പന്തലായനി ബ്ലോക്ക് പഞ്ചായത്ത് ഓഫീസിനു മുന്നിലായിരുന്നു സംഭവം.

തലശ്ശേരിയിൽ നിന്ന് യാത്രക്കാരുമായി കോഴിക്കോടേക്ക് പോവുകയായിരുന്നു കെ.എസ്.ആർ.ടിയുടെ KL 15-8909 ടി.ടി.ബസ്സ്. പന്തലായനി ബ്ലോക്ക് പഞ്ചായത്ത് ഓഫീസിന് മുന്നിലെത്തിയപ്പോൾ എഞ്ചിനിൽ നിന്നും കടുത്ത ചൂടും പുകയുമുയരുകയായിരുന്നു. ഇതിനെ തുടർന്ന് പെട്ടന്ന് തന്നെ ബസ് സെെഡിലേക്ക് ഒതുക്കി നിർത്തി മുഴുവൻ യാത്രക്കാരെയും ഇറക്കി.

റേഡിയേറ്ററിൽ വെള്ളമില്ലാത്തതിനെ തുടർന്നാണ് എഞ്ചിൻ ചൂടാവുകയും പുക ഉയരുന്നതിനും ഇടയാക്കിയത്. ഇതേതുടർന്ന് ബസ്സിലുണ്ടായിരുന്ന യാത്രക്കാരെ മറ്റൊരു ബസ്സിൽ കയറ്റി വിട്ടു.