”ദേശീയപാത നിര്‍മ്മാണ പ്രവൃത്തി ത്വരിത ഗതിയില്‍ പൂര്‍ത്തിയാക്കണം”; ആവശ്യമുയര്‍ത്തി സി.പി.ഐ കൊയിലാണ്ടി ലോക്കല്‍ സമ്മേളനം
കൊയിലാണ്ടി: ദേശീയ പാത നിര്‍മ്മാണ പ്രവൃത്തി എത്രയും വേഗം പൂര്‍ത്തീകരിക്കണമെന്നും, തദ്ദേശ സ്വയംഭരണ സ്ഥാപനങ്ങളുമായി കൂടിയാലോചിച്ച് ആവശ്യമായ സ്ഥലങ്ങളിലെല്ലാം ഓവുചാലുകള്‍ ശാസ്ത്രീയമായി നിര്‍മിക്കണമെന്നും സി പി ഐ കൊയിലാണ്ടി ലോക്കല്‍ സമ്മേളനം ദേശീയപാത അധികൃതരോട് ആവശ്യപ്പെട്ടു.
കൊല്ലത്ത് പവിത്രന്‍ മേലൂര്‍, ടി.പി.അബ്ദുള്ള നഗറില്‍ നടന്ന സമ്മേളനം സി.പി.ഐ ജില്ലാ സെക്രട്ടറി കെ.കെ ബാലന്‍മാസ്റ്റര്‍ ഉദ്ഘാടനം ചെയ്തു.
സി.പി.ഐ പാര്‍ട്ടി ജില്ലാ കമ്മിറ്റി അംഗങ്ങളായ ഇ.കെഅജിത്, ആര്‍.സത്യന്‍, പാര്‍ട്ടി മണ്ഡലം സെക്രട്ടറി അഡ്വ സുനില്‍ മോഹന്‍, പി.കെ.വിശ്വനാഥന്‍, കെ. ചിന്നന്‍, കെശശിധരന്‍ എന്നിവര്‍ സമ്മേളനത്തെ അഭിവാദ്യം ചെയ്തു. പി.വി.രാജന്‍, വിജയഭാരതി, കെ.കെ.സജീവന്‍ എന്നിവരടങ്ങുന്ന പ്രസീഡിയവും കെ.എസ്.രമേശ് ചന്ദ്ര, ബാബു പഞ്ഞാട്ട് എന്നിവരടങ്ങുന്ന സ്റ്റിയറിംഗ് കമ്മിറ്റിയും സമ്മേളന നടപടികള്‍ നിയന്ത്രിച്ചു.
രാഗം മുഹമ്മദലി രക്തസാക്ഷി പ്രമേയവും സി.ആര്‍.മനേഷ് അനുശോചനം പ്രമേയവും അവതരിപ്പിച്ചു. ശശിധരന്‍ കോമത്ത് സ്വാഗതമാശംസിച്ചു. വി.എം.കൃഷ്ണന്‍ പതാകയുയര്‍ത്തി. മുതിര്‍ന്ന സഖാക്കളായ ആര്‍.നാണു, സി.പി.നാരായണന്‍, വി.എം.കൃഷ്ണന്‍ എന്നിവരെ ആദരിച്ചു. സമ്മേളനത്തിന് ആരംഭം കുറിച്ച് കൊണ്ട് കൊല്ലം ടൗണില്‍ പ്രകടനം നടത്തി.
സെക്രട്ടറിയായി കെ.എസ്.രമേഷ് ചന്ദ്രയേയും അസി. സെക്രട്ടറിയായി പി.വി.രാജനേയും തെരഞ്ഞെടുത്തു.