അയനിക്കാട് 24 ആം മൈലില്‍ ബസ്സ് നിയന്ത്രണംവിട്ട് ഡിവൈഡറില്‍ ഇടിച്ചു; നിരവധി യാത്രക്കാര്‍ക്ക് പരിക്ക്
പയ്യോളി: പയ്യോളിയില്‍ ബസ്സ് നിയന്ത്രണംവിട്ട് ഡിവൈഡറില്‍ ഇടിച്ച് അപകടം. നിരവധി യാത്രക്കാര്‍ക്ക് പരിക്കേറ്റു. ഇന്ന് രാവിലെ 11 മണിയോടെ അയനിക്കാട് 24 ആം മൈലില്‍ മാപ്പിള എ.എല്‍.എപി സ്‌കൂളിന് സമീപത്ത് വെച്ചാണ് സംഭവം.
കോഴിക്കോട് – തലശ്ശേരി റൂട്ടിലോടുന്ന സിറ്റി ഫ്‌ളവര്‍ ബസ്സ് സര്‍വ്വീസ് റോഡില്‍ നിന്നും ദേശീയപാതയിലേയ്ക്ക് കയറുന്നതിനിടെ നിയന്ത്രണംവിട്ട് ഡിവൈഡറില്‍ ഇടിച്ച് നില്‍ക്കുകയായിരുന്നു.
വടകര ഭാഗത്തേയ്ക്ക് പോകുന്നമറ്റൊരു ബസ്സിനെ മറികടക്കുന്നതിനിടെയാണ് നിയന്ത്രണംവിട്ടതെന്ന് യാത്രക്കാര്‍ പറയുന്നു. ഇടിയുടെ ആഘാതം മൂലം ബസ്സിലെ നിരവധി യാത്രക്കാര്‍ക്ക് നിസ്സാരമായി പരിക്കേറ്റു. പരിക്കേറ്റവര്‍ വിവിധ ആശുപത്രികളില്‍ ചികിത്സ തേടി.