കൊയിലാണ്ടി: ഇന്ത്യൻ റെഡ്ക്രോസ് സൊസൈറ്റി കൊയിലാണ്ടി താലൂക്ക് കമ്മറ്റിയുടെ ജില്ലയിലെ മികച്ച ദുരന്ത രക്ഷാപ്രവർത്തകന്‌ നൽകുന്ന എ.ടി അഷ്‌റഫ് സ്മാരക റെഡ് ക്രോസ് അവാര്‍ഡ്‌ ഷംസുദ്ദീൻ എകരൂലിന്‌. പൂനൂർ കേന്ദ്രീകരിച്ച്‌ പ്രവർത്തിക്കുന്ന ഹെൽത്ത് കെയർ ഫൗണ്ടേഷൻ ഡിസാസ്റ്റർ മാനേജ്മെൻ്റ് ടീമിൻ്റെ ടീം ലീഡർ ആണ്‌ ഷംസുദ്ദീൻ.

തുടർച്ചയായി നാലാം വർഷമാണ് എ.ടി അഷറഫ് സ്മാരക റെഡ്ക്രോസ് അവാർഡ് നൽകുന്നത്. 5001 രൂപയും ശിൽപവും പ്രശസ്തിപത്രവും പൊന്നാടയുമാണ് നൽകുന്നത്. ഫെബ്രുവരി 22ന് കൊയിലാണ്ടി സിവിൽ സ്റ്റേഷൻ ഹാളിൽ നടക്കുന്ന പരിപാടിയിൽ കാനത്തിൽ ജമീല എം.എൽ.എ അവാർഡ് സമ്മാനിക്കും.

കേരളത്തെ നടുക്കിയ പ്രളയങ്ങളിലും, ഉരുൾപൊട്ടലുകളിലും, നിപ, കൊറോണ തുടങ്ങിയ അടിയന്തിര സാഹചര്യങ്ങളിലെല്ലാം നടത്തിയ രക്ഷാപ്രവർത്തനങ്ങളിൽ 150ലധികം വളണ്ടിയർമാരെ നയിച്ചത് ഷംസുദ്ദീൻ ആണ്. ഇദ്ദേഹത്തിൻ്റെ നേതൃത്വത്തിൽ കേരളത്തിലുടനീളം നടത്തിയിട്ടുള്ള അഞ്ഞൂറിലധികം ഡിസാസ്റ്റർ മാനേജ്മെൻ്റ് ട്രെയിനിങിലൂടെ ഇരുപത്തയ്യായിരം ആളുകൾക്ക് രക്ഷാപ്രവർത്തനത്തിൽ പരിശീലനം നല്‍കിയിട്ടുണ്ട്‌.

പത്രസമ്മേളനത്തിൽ അവാർഡ് ജൂറി ചെയർമാൻ എം.ജിബൽരാജ്, റെഡ് ക്രോസ് സൊസൈറ്റി താലൂക്ക് സെക്രട്ടറി ആർ.സി ബിജിത്ത്, വൈസ് ചെയർമാൻ സി.ബാലൻ, മാനേജ്മെൻ്റ് കമ്മറ്റി അംഗം അമീറലി എന്നിവർ പങ്കെടുത്തു.

Description: AT Ashraf Memorial Red Cross Award by Indian Red Cross Society Koyilandy Taluk Committee to Shamsuddin Ekarul