പേരാമ്പ്ര; വിദ്യാര്‍ത്ഥികള്‍ കയറുന്നതിനിടെ ബസ്സ് മുന്നോട്ടെടുത്തു. ഇന്ന് രാവിലെ 9 മണിയോടെ മാര്‍ക്കറ്റ് സ്‌റ്റോപ്പില്‍ വെച്ചാണ് സംഭവം. ബസ്സ് പെട്ടെന്ന് മുന്നോട്ടെടുക്കുന്നതിനിടെ ബസ്സില്‍ നിന്നും വീണ് വിദ്യാര്‍ത്ഥിനിയ്ക്ക് പരിക്കേറ്റു. നൊച്ചാട് ഹയര്‍സെക്കന്‍ഡറി സ്‌കൂളിലെ എട്ടാം ക്ലാസ് വിദ്യാര്‍ത്ഥിനിയ്ക്കാണ് പരിക്കേറ്റത്.

കുറ്റ്യാടി- കോഴിക്കോട് റൂട്ടിലോടുന്ന അദ്‌നാന്‍ ബസ്സ് പെട്ടെന്ന് എടുത്തപ്പോള്‍ വീണ വിദ്യാര്‍ത്ഥിനി ഡോറിന് സമീപത്തെ കമ്പിയില്‍ പിടിച്ചിരിക്കുകയായിരുന്നു. വിദ്യാര്‍ത്ഥിനിയെയും വലിച്ച് കുറച്ചുനേരം ബസ്സ് മുന്നോട്ടെടുത്തു. നാട്ടുകാരുടെ ശ്രദ്ധയില്‍പ്പെട്ടതിനെ തുടര്‍ന്നാണ് ബസ്സ് നിര്‍ത്തിയത്. വിദ്യാര്‍ത്ഥിനിയുടെ കാല്‍മുട്ട് ഉരഞ്ഞ് പരിക്കേറ്റിട്ടുണ്ട്.