കൊയിലാണ്ടി: ചളിയും പായലും നിറഞ്ഞ് ഉപയോഗശൂന്യമായ അണലേ-കുറുവങ്ങാട്ടെ ചേട്ടിയാട്ട് കുളത്തിന് അമൃത് പദ്ധതിയിലൂടെ പുതുജീവന്‍ നല്‍കിയിരിക്കുകയാണ്. നവീകരിച്ച കുളത്തിന്റെ ഉദ്ഘാടനം ഡിസംബര്‍ മൂന്നിന് വൈകുന്നേരം മൂന്നുമണിക്ക് കൊയിലാണ്ടി എം.എല്‍.എ കാനത്തില്‍ ജമീല നിര്‍വഹിക്കും. ജലാശയങ്ങള്‍ സംരക്ഷിക്കുന്നതിനുള്ള പദ്ധതിയുടെ ഭാഗമായാണ് നഗരസഭ ഏറ്റെടുത്ത് കുളം നവീകരിച്ചത്. ഒരു കൊല്ലത്തിനുള്ളിലാണ് കുളത്തിന്റെ നവീകരണ പ്രവൃത്തികള്‍ പൂര്‍ത്തിയാക്കിയത്.

ചേട്ടിയാട്ട് കുളം, കൊല്ലത്തെ നാണംചിറ, പന്തലായനിയിലെ നമ്പിവീട്ടില്‍ കുളം, കോമത്തു കരയിലെ തച്ചംവള്ളിക്കുളം, ഒറ്റക്കണ്ടത്തെ വടക്കുമ്പാട്ട് ഇല്ലംകുളം അടക്കം അഞ്ച് കുളങ്ങളുടെ നവീകരണമാണ് നഗരസഭ ഏറ്റെടുത്തത്. ഒരു കോടി രൂപയാണ് ഇതിനായി ചെലവിടുന്നത്. ഇതില്‍ നാണംചിറ, നമ്പിവീട്ടില്‍ കുളം എന്നിവയുടെ നിര്‍മ്മാണം പൂര്‍ത്തിയായി വരുന്നു. സ്വകാര്യ വ്യക്തികളുടെ ഉടമസ്ഥതയിലായിരുന്ന ഈ കുളങ്ങള്‍ നഗരസഭയ്ക്ക് വിട്ടുകൊടുത്തതാണ്.

രണ്ട് കുളങ്ങളുടെ നിര്‍മ്മാണം ഉടന്‍ ആരംഭിക്കും. കൂടാതെ അമൃത് മിത്ര പദ്ധതി പ്രകാരം നഗരസഭയിലെ വിവിധ ജലാശങ്ങള്‍ സംരക്ഷികുന്ന പ്രവര്‍ത്തനങ്ങള്‍ക്ക് രൂപരേഖ തയ്യാറാക്കി വരികയാണ്.

28 ലക്ഷം രൂപ ചിലവഴിച്ചാണ് ചേട്ടിയാട്ട് കുളത്തിന്റെ നവീകരണ പ്രവൃത്തികള്‍ പൂര്‍ത്തിയാക്കിയത്. പ്രദേശത്തെ സ്വകാര്യ വ്യക്തിയുടേതാണ് കുളം. ഒരു കൊല്ലം മുമ്പാണ് കുടുംബം കുളം നഗരസഭയ്ക്ക് വിട്ടുനല്‍കിയത്. നാല്‍പ്പത്തിയഞ്ച് വര്‍ഷം മുമ്പ് ആളുകള്‍ നിത്യവും ഉപയോഗിക്കുന്ന കുളം പിന്നീട് കൃത്യമായ പരിപാലനവും മറ്റുമില്ലാതെ ചളിയും പായലും നിറഞ്ഞ് ഉപയോഗ ശൂന്യമാവുകയായിരുന്നു. നഗരസഭ ഏറ്റെടുത്തതോടെ വളരെ പെട്ടെന്നായിരുന്നു നവീകരണ പ്രവൃത്തികള്‍.

Description: ANELA- KURUVANGAD Chettiattil pond has been renovated