കൊയിലാണ്ടി മണമലില്‍ റോഡരികില്‍ കക്കൂസ് മാലിന്യം തള്ളാന്‍ ശ്രമം; മൂന്നുപേര്‍ പിടിയില്‍
കൊയിലാണ്ടി: മണമലില്‍ രാത്രിയുടെ മറവില്‍ റോഡരികില്‍ കക്കൂസ് മാലിന്യം തള്ളിയ മൂന്നുപേര്‍ പിടിയില്‍. ഇരിങ്ങത്ത് സ്വദേശികളായ സുബൈര്‍, അബ്ദുള്‍ സമദ്, പയ്യോളി സ്വദേശി റഫീഖ് എന്നിവരാണ് പിടിയിലായത്. ഇന്നലെ രാത്രി പതിനൊന്നുമണിയോടെ മണമല്‍ ബൈപ്പാസിന് സമീപത്താണ് സംഭവം.
കെ.എല്‍ 56 ബി 0643 നമ്പറിലുള്ള ബൊലേറോ പിക്കപ്പില്‍ മാലിന്യവുമായെത്തി റോഡരികില്‍ തള്ളാന്‍ ശ്രമിക്കുന്നത് നാട്ടുകാരുടെ ശ്രദ്ധയില്‍പ്പെടുകയായിരുന്നു. ഉടനെ പ്രദേശവാസികള്‍ കൊയിലാണ്ടി പൊലീസില്‍ വിവരം അറിയിക്കുകയായിരുന്നു. നേരത്തെയും ഇവിടെ മാലിന്യം തള്ളിയ സംഭവമുണ്ടായിരുന്നെന്നും അതിനാല്‍ നാട്ടുകാര്‍ ജാഗരൂകരായിരുന്നു.
പൊതുസ്ഥലത്ത് മാലിന്യം നിക്ഷേപിച്ചതിന് പ്രതികള്‍ക്കെതിരെ പൊലീസ് കേസെടുത്തിട്ടുണ്ട്. വാഹനവും കസ്റ്റഡിയിലെടുത്തിട്ടുണ്ട്.