പൊയില്‍ക്കാവില്‍ നിര്‍ത്തിയിട്ട സ്‌കൂട്ടറിനുളളില്‍ നിന്നും മൂര്‍ഖന്‍ പാമ്പിനെ പിടികൂടി
കൊയിലാണ്ടി: പൊയില്‍ക്കാവില്‍ നിര്‍ത്തിയിട്ട സ്‌കൂട്ടറിനുളളില്‍ കയറിയ മൂര്‍ഖന്‍ പാമ്പിനെ പിടികൂടി. ബുധനാഴ്ച രാവിലെ 9 മണിയോടെയായിരുന്നു സംഭവം. പൊയില്‍ക്കാവ് ടൗണിലെ സ്റ്റേഷനറി കടയ്ക്ക് സമീപമുളള സ്ഥലത്തുനിന്നും മൂര്‍ഖന്‍ സ്റ്റേഷനറി കടയിലേക്ക് കയറാന്‍ ശ്രമിക്കവെ കടക്കാരന്‍ മൂര്‍ഖനെ വഴിതെളിച്ചുവിടുകയായിരുന്നു.
തുടര്‍ന്ന് റോഡിന് സമീപത്ത് നിര്‍ത്തിയിട്ടിരുന്ന സ്‌കൂട്ടറിനുളളിലേക്ക് കയറുകയായിരുന്നു. ടൗണില്‍ തന്നെയുളള ഹോട്ടല്‍ ഉടമയുടെ സ്‌കൂട്ടറിലാണ് മൂര്‍ഖന്‍ കയറിയത്.
ഏറെ നേരം നാട്ടുകാരും മറ്റും മൂര്‍ഖനെ പുറത്താക്കാന്‍ ശ്രമിച്ചെങ്കിലും നടന്നില്ല. തുടര്‍ന്ന് സമീപപ്രദേശത്തെ പാമ്പുപിടുത്തക്കാരന്‍ സ്ഥലത്തെത്തി പുറത്തെടുക്കുകയായിരുന്നു. സ്‌കൂട്ടറിന്റെ എയര്‍ഫില്‍ട്ടറിന്റെ ഉളളില്‍ നിന്നുമാണ് മൂര്‍ഖനെ പുറത്തെടുത്തത്.