ഒളിവില്‍ കഴിഞ്ഞത് പതിനേഴ് വര്‍ഷം, ഒടുവില്‍ അമ്മയെ കാണാന്‍ നാദാപുരത്തെ വീട്ടിലെത്തി; കവര്‍ച്ചാകേസ് പ്രതി ഒടുവില്‍ പിടിയില്‍
നാദാപുരം: പതിനേഴ് വര്‍ഷമായി പോലീസിനെ വെട്ടിച്ച് ഒളിവില്‍ കഴിഞ്ഞ പ്രതി അറസ്റ്റില്‍. ചെക്യാട് സ്വദേശി പാറച്ചാലില്‍ കബീറാണ്(43) അറസ്റ്റിലായത്. 2002ല്‍ ചെക്യാട് പുളിയാവില്‍ വീട്ടമ്മയെ ആക്രമിച്ച് പരിക്കേല്‍പ്പിച്ച് സ്വര്‍ണകമ്മല്‍ കവര്‍ന്ന കേസിലെ പ്രതിയാണ് ബഷീര്‍.
കേസില്‍ കബീറിന് രണ്ടര വര്‍ഷം തടവും പിഴയും നാദാപുരം കോടതി വിധിച്ചിരുന്നു. എന്നാല്‍ ഇതിന് പിന്നാലെ കബീര്‍ ഒളിവില്‍ പോവുകയായിരുന്നു. ബുധനാഴ്ച രാത്രി കബീര്‍ നിട്ടൂരിലെ അമ്മ വീട്ടില്‍ എത്തുന്നതായി വിവരം ലഭിച്ച വളയം പോലീസ് പ്രതിയെ വളയുകയായിരുന്നു.
എന്നാല്‍ പോലീസിനെ കണ്ട് വീട്ടില്‍ നിന്നിറങ്ങി ഓടിരക്ഷപ്പെട്ട കബീറിനെ ഒരു കിലോമീറ്ററോളം പിന്തുടര്‍ന്നാണ് പോലീസ് പിടികൂടിയത്. ഒന്‍പത് പോലീസ് സ്റ്റേഷനുകളിലായി പിടിച്ചുപറി, ലഹരി മരുന്ന് കടത്ത്, മോഷണം തുടങ്ങി പത്തൊന്‍പതോളം കേസുകളില്‍ പ്രതിയാണ് കബീറെന്ന് പോലീസ് പറഞ്ഞു.