കൊ‌യിലാണ്ടി: നടേരി കാവുവട്ടം സ്വദേശിയായ യുവാവിനെ സംഘം ചേർന്ന് ആളുകൾ മർദ്ദിച്ചതായി പരാതി. കാവുവട്ടം കരുവാരക്കണ്ടി ഇസ്മയിലിനാണ് മർദ്ദനമേറ്റത്. ഇന്നലെ രാത്രി പത്തരയ്ക്ക് ശേഷം കൊയിലാണ്ടി ട്രാഫിക് പോലീസ്റ്റേഷൻ റോഡിൽ ആണ് മർദ്ദനം നടന്നത്.

സംഘം ചേർന്നുള്ള ആക്രമണത്തിൽ ഇസ്മയിലിന്റെ ചെവിയുടെ കർണ്ണപടം പൊട്ടി. ആക്രമണത്തിൽ പരിക്കേറ്റ ഇസ്മയിലിനെ ആദ്യം കൊയിലാണ്ടി താലൂക്ക് ആശുപത്രിയിലും പിന്നീട് കോഴിക്കോട് മെഡിക്കൽ കോളേജ് ആശുപത്രിയിലും പ്രവേശിപ്പിച്ചു.

ആറ് മാസം മുമ്പ് കാവുംവട്ടത്തെ ഒരു കല്യാണ വീട്ടിൽ സംഘർഷമുണ്ടായിരുന്നു. ഈ സമയത്ത് ചെങ്ങോട്ട്കാവ് കവലാട് ടീമിന് അടി കിട്ടിയിരുന്നു. ഇതിന്റെ പ്രതികാരമാണ് ഇസ്മയിലിനെ മർദ്ദിക്കുന്നതിലേക്ക് നയിച്ചതെന്നാണ് ആരോപണം. 12-ഓളം പേരടങ്ങുന്ന സംഘമാണ് മർദ്ദിച്ചത്.

അപകടത്തിൽ പരിക്കേറ്റ് ചികിത്സയിലായിരുന്ന ഇസ്മയിൽ ഇന്നലെ രാത്രി സുഹൃത്തുക്കൾക്കൊപ്പം പുറത്തുവന്നതായിരുന്നു. ഈ സമയത്ത് പ്രദേശത്തെത്തിയ  സംഘവുമായി വാക്കുതർക്കവും പിന്നാലെ കയ്യാങ്കളിയുമാകുകയായിരുന്നു. ഏറെ നേരം സംയമനത്തിന് ശ്രമിച്ചിരുന്നെങ്കിലും സംഘം കൂട്ടാക്കിയില്ലെന്ന് ദൃക്ഷാഷികൾ പറയുന്നു.