തീയെ നേരിടാന്‍ ഇവര്‍ പ്രാപ്തര്‍; ചങ്ങരോത്ത് ഗ്രാമപഞ്ചായത്തിലെ മുഴുവന്‍ ഹരിത കര്‍മ്മ സേനാംഗങ്ങള്‍ക്കും അഗ്നി പ്രതിരോധ മാര്‍ഗങ്ങളില്‍ പരിശീലനം നല്‍കി പേരാമ്പ്ര അഗ്നിരക്ഷാ സേന
ചങ്ങരോത്ത്: ചങ്ങരോത്ത് ഗ്രാമപഞ്ചായത്തിലെ ഹരിതകര്‍മ്മസേനാ പ്രവര്‍ത്തകര്‍ക്ക് അഗ്നി പ്രതിരോധ പ്രവര്‍ത്തനങ്ങളില്‍ പേരാമ്പ്ര അഗ്‌നിരക്ഷാസേന പ്രായോഗികപരിശീലനം നല്‍കി. കടിയങ്ങാടുള്ള പഞ്ചായത്ത് കമ്മ്യൂണിറ്റിഹാളില്‍ നടന്ന ചടങ്ങില്‍ പഞ്ചായത്തിലെ മുഴുവന്‍ ഹരിതകര്‍മ്മസേനാംഗങ്ങള്‍ക്കും അഗ്‌നിപ്രതിരോധ മാര്‍ഗ്ഗങ്ങളെകുറിച്ച് പ്രായോഗിക പരിശീലനം നല്‍കി.
പേരാമ്പ്ര അഗ്‌നിരക്ഷാനിലയത്തിലെ അസി.സ്റ്റേഷന്‍ ഓഫീസ്സര്‍ പി.സി.പ്രേമന്‍ ക്ലാസ്സുകള്‍ എടുത്തു. പഞ്ചായത്ത് സിക്രട്ടറി ഷാജി സ്റ്റീഫന്‍ അദ്ധ്യക്ഷത വഹിച്ച പരിപാടിയില്‍ അസി.സെക്രട്ടറി ശ്രീജിത്ത് സ്വാഗതവും ഹരിതകര്‍മ്മസേന സെക്രട്ടറി നളിനി നന്ദിയും പറഞ്ഞു. ആരോഗ്യവിദ്യാഭ്യാസ സ്റ്റാന്റിംഗ് കമ്മറ്റി ചെയര്‍മാന്‍ ബഷീര്‍, വി.ഇ.ഒ ധന്യമാധവന്‍ എന്നിവര്‍ പരിപാടിയില്‍ സജീവസാന്നിധ്യമായി.