കുറ്റ്യാടിയില്‍ ഭീതിപരത്തി ഭ്രാന്തന്‍നായ; പത്തോളം പേര്‍ക്ക് കടിയേറ്റു
കുറ്റ്യാടി: തൊട്ടില്‍പാലത്തും മരുതോങ്കരയിലും ഭീതി വിതച്ച് ഭ്രാന്തന്‍ നായ. ബുധനാഴ്ച്ച വൈകീട്ടും രാത്രിയിലുമായി പ്രദേശങ്ങളിലെ പത്തോളം പേര്‍ക്ക് നായയുടെ കടിയേറ്റു. ഗുരുതരമായി പരിക്കേറ്റ രണ്ടുപേരെ കോഴിക്കോട് മെഡിക്കല്‍ കോളേജ് ആശുപത്രിയില്‍ പ്രവേശിപ്പിച്ചു.
ഇന്നലെ വൈകീട്ടോടെ തൊട്ടില്‍പാലം ഭാഗത്തുനിന്ന് രണ്ടുപേരെ കടിച്ച് മരുതോങ്കര കല്ലുനിര ഭാഗത്തേക്ക് എത്തിയ നായ അവിടെ നിന്നും പരക്കെ നിരവധിപ്പേരെ കടിച്ച് പരിക്കേല്‍പ്പിക്കുകയായിരുന്നു.
കൊറ്റോത്തുമ്മല്‍ പവിത്രന്‍ (39), തൊട്ടില്‍പാലം ബെല്‍ മൗണ്ടില്‍നിന്ന് നായയുടെ കടിയേറ്റ ഹംന ഫാത്തിമ (11) എന്നിവരെ കോഴിക്കോട് മെഡിക്കല്‍ കോളേജ് ആശുപത്രിയില്‍ പ്രവേശിപ്പിച്ചു. മറ്റുള്ളവര്‍ കുറ്റ്യാടി ഗവ. താലൂക്ക് ആശുപത്രിയില്‍ ചികിത്സതേടി. ആക്രമകാരിയായ ഒരു നായയെ നാട്ടുകാര്‍ ചേര്‍ന്ന് തല്ലിക്കൊന്നതായി പ്രദേശവാസികള്‍ പറഞ്ഞു