പയ്യോളി: പയ്യോളിയിലെ രണ്ട് ക്ഷേത്രങ്ങളില്‍ കവര്‍ച്ച. ഇരിങ്ങല്‍ ധര്‍മ്മശാസ്ത്ര ക്ഷേത്രത്തിലും അയനിക്കാട് മമ്പറംഗേറ്റ് ഭഗവതി കോട്ടക്കല്‍ ദേവീക്ഷേത്രത്തിലുമാണ് മോഷണം നടന്നത്. ഇന്ന് രാവിലെയോടെയാണ് സംഭവം പുറത്തറിയുന്നത്. അയനിക്കാട് മമ്പറംഗേറ്റ് ഭഗവതി ക്ഷേത്രത്തിലെ ചുറ്റുമതിലിന് പുറത്തുള്ള രണ്ട് സ്റ്റീല്‍ ഭണ്ഡാരങ്ങളുടെ പൂട്ട് തകര്‍ത്താണ് കവര്‍ച്ച നടത്തിയിരിക്കുന്നത്.

രാവിലെ ക്ഷേത്രത്തിലെത്തിയ ഭക്തനാണ് ഭണ്ഡാരത്തിന്റെ പൂട്ട് തകര്‍ന്ന് കിടക്കുന്നത് ക്ഷേത്ര ഭാരവാഹികളെ അറിയിക്കുന്നത്. തുടര്‍ന്ന് ഇവര്‍ പയ്യോളി പോലീസില്‍ പരാതി നല്‍കുകയായിരുന്നു.

ഇതേ രീതിയില്‍ തന്നെയാണ് ഇരിങ്ങല്‍ ധര്‍മശാസ്ത്ര ക്ഷേത്രത്തിലും മോഷണം നടന്നിരിക്കുന്നത്. ക്ഷേത്ര ചുറ്റുമതിലിനും പുറത്തും അകത്തുമുള്ള രണ്ട് സ്റ്റീല്‍ ഭണ്ഡാരങ്ങളുടെ പൂട്ട് തകര്‍ത്ത നിലയിലാണ്. മാത്രമല്ല ക്ഷേത്രത്തിലെ ഓഫീസിന്റെയും പൂട്ട് തകര്‍ത്തിട്ടുണ്ട്. എന്നാല്‍ ഓഫീസില്‍ നിന്നും ഒന്നും നഷ്ടപ്പെട്ടിട്ടില്ല. സംഭവം ശ്രദ്ധയില്‍പെട്ടതോടെ ക്ഷേത്ര ഭാരവാഹികള്‍ പയ്യോളി പോലീസില്‍ പരാതി നല്‍കി.

Description: Robbery attempt at two temples in Payyoli